Nakabsan sa kinabuhi ang duha ka mga batan-on sulod sa internitan sa Purok 3, Feeder Road 1, Barangay Tibal-og, Santo Tomas, Davao del Norte.
Giila ang mga biktima nga sila alias “Sam” menor de edad ug alias “Ninio” 22-anyos nga mga residente sa Purok 1, Menzi, Barangay Tibal-og, sa maong munisipalidad.
Samtang, ang suspek giilang si Alyas “Tawe,” 25-anyos, residente sa Purok 2, Barangay New Katipunan sa nasampit nga munisipalidad.
Subay sa inisyal nga imbistigasyon sa mga kapulisan, nahitabo ang pagpanunggab pasado alas 2:00 sa kaadlawon, niadtong Hulyo 14 sulod sa Internet Cafe human nga kalit lamang nagkaguliyang tungod sa pagbitbit sa suspetsado nga si alyas Tawi og mga fire extinguisher og gibunalan ang duha ka mga biktima ug gilayon nga gidunggab sa suspetsado gamit ang star screw.
Nakahiagom og mga samad dinunggaban ang mga biktima nga miresulta sa ilahang kamatayon nga bisan pa ug gidali kini og dala sa ospital.
Nasayran nga ang biktima nga si Ninio ang nakaangkon og samad sa ulo ug nagkadaiyang samad sa likod nga bahin, samtang si alias “Sam” ang nakaangkon usab og samad sa ulo og kalawasan nga miresulta sa iyahang kamatayon.
Sa crime scene narekober tulo ka mga fire estinguisher. Dugang pa usab sa imbistigasyon sa kapulisan, nasayran nga lango sa ilimnon nga makahubog ang suspetsado.
Sa pagkakaron, tingkagol na sa selda sa mga otoridad ang suspek aron nga atubangon ang mga kaso.
