Nakabsan sa kinabuhi ang duha ka mga bata human nga nadat-ugan sa pader gumikan sa pagkatagak sa dakong sanga sa kahoy kagahapon sa hapon. Subay sa report sa mga otoridad, usa usab ka bata ang angol tungod sa maong panghitabo.
Giila ang namatay nga mga biktima nga sila Paul John Dahan Pastera, 10-anyos ug si Marcus Romagos Pagal, 7-anyos, samtang naangol mao si Paula Rhiane Suan, 10-anyos.
Sa imbistigasyon sa mga kapulisan, nahitabo ang pagkatagak sa dakong sanga sa kahoy atol sa nahitabong paghaguros sa kusog nga hangin kon Ipo-Ipo sa Park 10, Doña Salud, Km 10, Sasa, ning dakbayan sa Davao pasado alas 2:00 kagahapon sa hapon diin ang mga biktima nagdula sa usa ka abandonado nga balay nga didto usab natumba ang kahoy.
Tungod sa pagkabali sa kahoy gumikan sa kusog nga hangin, napadulong kini sa pader ug nahugmak kini nga maoy hinungdan nga nadat-ugan ang mga bata.
