Maghatod matud pa og mas dakong epekto ang 2 ka bagyo sa nasud.
Sumala pa sa PAGASA nga dunay bag-ong low pressure area ang ilang nasiplatan gawas sa Philippine Area of Responsibility (PAR) sa sidlakang bahin sa nasud ug tawagon kining Bagyong Leon.
Kabahin niini, sa higayong mugawas sa PAR ang Bagyong Kristine karong hapon, Oktobre 25 ning tuiga, posibleng magtuyok-tuyok kini sa West Philippine Sea ug subling mubalik sa nasud karong adlawng Dominggo o Lunes, depende sa epekto sa LPA sa sidlakang bahin sa MIndanao nga posibleng mahimong tropical depression sa musunod nga 24 oras.
Gani, posible sab nga mas mukusog pa ang bagyong Kristine samtang anaa kini sa taas sa West Philippine Sea.
Gumikan niini, posibleng mahitabo ang Fujiwhara Effect sa higayong makasulod na ang laing bagyo sa nasud.
Ang Fujiwara Effect mahitabo sa higayong og dunay 2 ka bagyo ang mag-abot nga posibleng birahon sa mas kusgan nga bagyo ang hinay nga bagyo nga maoy magmugna og mas kusog nga kadaot ug epekto sa pipila ka lugar.
Nunot pa man niini, bisan magU-turn ang bagyong Kristine, muhinay ra usab kini og gawas sa nasud ug mupadulong sa amihanang direksyon sa China.
Niadtong milabay nga 2011, nakasinati sab ang nasud og susamang panghitabo nga nagbilin og dakong kadaot sa pipila ka bahin sa Luzon.
