Nakatala og duha ka insidente sa pagkalumos ang tibuok Davao Region atol sa Semana Santa, diin susama nga nakainom sa ilimnong makahubog ang mga biktima. Sa Tinago Beach, Barangay Pangubatan sa Island Garden City of Samal, usa ka lalaki nga giilang si alyas Adrian ang nalumos ug nakabsan sa kinabuhi sa adlaw sa Pasko sa Pagkabanhaw, kagahapong adlawa.
Sumala sa report sa Coast Guard IGACOS Station, paspas nga miresponde ang ilang team sa pagkahibalo sa insidente ug gihatagan gilayon og CPR ang biktima. Apan, sa ilahang pagsulay nawad-an na kini og ginhawa ug pulso, ug gideklara kining dead on arrival pag-abot sa balay tambalanan.
Samtang sa laing bahin, usa pa ka insidente ang nahitabo sa Barangay Leling, Hagonoy, Davao del Sur niadtong Biyernes Santo, Abril 18. Ang biktima mao si alyas Ernesto, 75 anyos, nga taga-Kidapawan City.
Nasayran nga nalumos kini samtang nangaligo sa dagat pasado ala-1:00 sa hapon. Gituohan nga naka-inom usab kini og ilimnong makahubog sa wala pa ang insidente.
Una ng nagpahimangno ang Philippine Coast Guard sa publiko, ilabi na sa panahon sa mga kasaulogan o [pagbakasyon sa init nga panahon, nga likayan ang paglangoy kung naka-inom.
Dili sab kalimtan ang pagpahimangno sa mga kaubanan ug pagmonitor sa mga kalit nga hulga sa kinaiyahan aron malikayan ang susamang trahedya.
