Gibutyag ni PAGASA Administrator Nathaniel Servando nga nagsugod na og interaksyon ang duha ka bagyo nga anaa karon sulod sa Philippine Area of Responsibility (PAR).
Kini naglakip sa tropical storm nga si Dante ug tropical depression nga si Emong.
Sa interbyu sa Bombo Radyo, gibutyag ni Servando nga tungod kay mas kusog ang bagyong si Dante, kini ang nakapaimpluwensya sa lihok ni Emong.
Gibira kini padulong sa direksyon sa Eastern Taiwan.
Apan sa dili pa kini modiretso sa Taiwan, molibot una kini sa Ilocos Region sa dili pa mosaka paingon sa amihanang bahin.
“Given their current distance which is about 1000, they are interacting each other or technically Fujiwhara effect. Dante is stronger than Emong, thus, is dominant and attract Emong to move toward eastern Taiwan. Looking on Emong’s track, it will loop while west of Ilocos Region, before moving towards Taiwan,,” matod ni Servando.
Ang Fujiwhara effect mao ang tawag sa interaksyon sa duha ka daot nga panahon nga nagduol sa usag usa.
Kini gihulma gikan sa ngalan ni Dr. Sakuhei Fujiwhara, usa ka Japanese nga meteorologist nga unang nakadiskubre sa maong phenomenon niadtong tuig 1921.
Sa iyang pagtuon kabahin sa lihok sa mga vortices sa tubig, iyang nabantayan ang talagsaong interaksyon sa duha ka bagyo o cyclonic systems kon magkaduol sila.
Kung kini mahitabo, ang duha ka bagyo maglibot-libot sa usa ka sentrong punto, nga daw nagsayaw sa hangin.
Mahimong resulta niini ang paglibot, pagduol, o paghiusa sa duha ka sistema sa bagyo.
