DAVAO CITY – Gipasabot ni Dr. Josephine Villafuerte ang hepe sa City Health Office (CHO) nganong adunay mga tawo nga maka-desisyon sa pagkutlo sa ilang kinabuhi.
Kini ang nahimong pahayag ni Villafuerte human nga usa na sab ka batan-on nga si Rheyn Mark Tubato ang nagkamatay pinaagi sa pag-ambak sulod sa Mall kagahapon diin gituohang tungod kini sa grabe nga depresyon. Matud pa kang Dr. Vallafuerte, adunay mga tawo nga kung makasinate ug frustration sa ilang kinabuhi ila na lamang kining ilu-om samtang ang uban dili makapahungaw sa ilang problema ngadto sa uban.
Dugang ni Dr. Villafuerte nga mas maayo gayud nga adunay makatambag o makatabang sa mga tawo nga adunay susama nga suliran aron nga dili sila makahuna-hunaon ug dautan ilabi na ang pagkutlo sa ilang kinabuhi.
Nanawagan na lamang ang opisyal nga kung makasinate ug tumang depresyon, mas maayo sumala pa nga makigkita sa mga grupo sa psychologist sa lokal nga panggamhanan nga andam motabang sa paghatag ug tambag ilabi na nga kinahanglan gayud nga giyahan ang mga tawo nga nag-atubang ug grabe nga suliran sa ilang kinabuhi.
