DAVAO CITY – Patay ang usa ka sakop sa Civil Security Unit (CSU) human pusila mga alas 10:00 ang takna sa kagabhi-on sa Villa Al District, Poblacion 2, Bansalan, Davao del Sur.
Naila ang biktima nga usa ka Jovito Alicaba, 50 anyos, sakop sa CSU sa Bansalan Municipal Hall.
Nasayran nga niining milabay nga gabi samtang ang nahisgutan nga biktima padulong na unta sa munisipyo alang sa pagduty isip usa ka CSU, apan gisundan ug duha ka mga suspetsadong lalaki nga sakay ug motorsiklo ug diretso nga gipusil ang biktima sa iyang likod hinongdan nga nakahi-agum ug grabe nga samad pinosilan sa iyang ulo ug likod nga bahin.
Diha-diha nga nabugtu-an sa iyang kinabuhi ang biktima gumikan sa grabe nga mga samad pinosilan gikan sa wala pa matino nga kalibre sa armas.
Dali sab dayon nga miikyas sakay sa ilang motorsiklo ang mga suspek human maseguro nga patay na ang ilang target. Padayon na ang kapolisan sa lungsod sa Bansalan sa pag-ila sa mga mamumuno.
Sa kasamtangan wala pa masayri ang motibo ug ang pagkatawo sa mga suspek nga dali nga miikyas human maseguro nga milampus sila sa ilang pagpatay sa biktima.
