Gipahipos ni Mayor Jose Relampagos ang 188 ka mga Small Town Lottery booths sa gumikan sa daghang reklamo nga nadawat gikan sa Barangay Salvacion, Panabo City.
Nasayrang ang maong reklamo nag-ugat sa dihang wala na matud pay kontrol ang pagbutang sa mga STL booths nga duol sa eskwelahan, sulod sa balay, daplin sa kalsada ug ibabaw sa kanal nga nakahatag og dakong pwersyo sa mga residente ug estudyante.
Matud pa ni Mayor Relampagos nga giabuso sa ahenteng Northman Gaming Corp., nga maoy gitugotan sa PCSO nga usa ka Small Town Lottery Authorized Agent Corporation (STL-AAC) sa Probinsiya sa Davao del Norte ang pagbutang og STL sa lungsod gumikan sa gidaghanon sa gipang-instalar matag barangay, ug nahimo na kining babag sa kadalanan ug illegal gumikan sa pagpapatad sa mga tawo og ‘last two’.
Gani, sa higayong dili matud pa mahipos sa mga nahisutan ang STL booths, mibahad si Mayor Relampagso nga mismong ang LGU Panabo na ang maghulbot matag-stall lakip na ang walay business permit to operate.
Apan, depensa sa PCSO ug ahente nga dili illegal ang pagbaligya og mga produkto sa PCSO tungod kauban sila sa gobyerno sa pagdugang sa lokal nga trabaho, pagpauswag usab sa kalidad sa kinabuhi, makahatag og programang panglawas, ug uban pang mga charity services.
Apan, wala kini mauyuni ni Relampagos gumikan inay nga maka-income ang gobyerno, daghang pamilya o katawhan ang apektado tungod sa kwartang magamit nga inay ipalit og pagkaon, panud-an, o allowance sa mga bata, giuna na matud pa ang pagpatad gumikan nanghinaot nga maswertehang mapalambo pa ang kwarta.
