Gikabutyag nga dili mo-ubos sa 18 ka tawo ang nangamatay sa usa ka stampede sa usa ka estasyon sa tren sa New Delhi, India sa dihang nagtinulakay ang mga tawo nga makasakay sa tren padulong sa labing dakong festival sa kalibutan nga mao ang Kumbh Mela.
Gipahigayon kini sa matag dose katuig sa Prayagraj, nga nakadani ug milyon-milyong mga deboto sa Hindu.
Matud pa sa mga awtoridad, stampede ang nahitabo sa dihang namugos ang mga deboto nga makasakay sa mga tren padulong sa kapistahan nga matapos sa Pebrero 26.
Gihulagway sa mga local authorities nga ang nahisgutang panghitabo mao ang labing kuyaw nga natigayon sa estasyon sa tren kung ikumpara sa nakalabay nga mga katuigan.
Apan, gipahayag usab ni Dr. Ritu Saxena, Deputy Medical Superintendent sa Lok Nayak Hospital sa New Delhi, 15 na ka tawo ang nakumperma nga namatay sa hospital.
Gikabutyag nga kadaghanan sa mga biktima mao ang mga kababaihan ug mga bata nga naipit sa dinut-anay.
Gipahayag sa usa ka porter nga nagtrabaho sa estasyon sa tren sukad pa niadtong 1981, nga karun pa lamang niini nasinati-an ang kaduot sa tawo.
Nagdugang na usab karon ug tren nga nagagikan sa New Delhi aron makontrola ang gidaghanon sa mga pasahero ilabi na sa adlaw sa festival.
Ang Kumbh Mela ang saulugon sulod sa unom ka semanang panagtapok nga adunay mosobra sa 500 milyong deboto nga mitambong sukad nga nagsugod kini kaniadtong milabay nga bulan.
Dili usab ikalimod nga ang nahisgutang kapistahan ang adunay kasaysayan sa panghitabo sa mga stampede, lakip na kaniadtong 1954 kung diin mosobra sa 400 ka tawo ang nangamatay ug usa pa niadtong 2013 nga gikamatay sa 36 ka tawo.
