Mokabat sa kinatibuk-an nga 79 sa 97 ka mga lokal nga kandidato sa dakbayan sa Davao ang nakasumite na sa ilahang Statements of Contributions and Expenses (Soce) sa Commission on Elections dinhi sa syudad hangtod niadtong Hunyo 11, 2025, ang katapusang adlaw sa pagsumite, nga gipahigayon sa buhatan sa Comelec sa Magsaysay Park.
Sa taho gikan sa Comelec, tulo (3) sa lima (5) ka mayoral candidates ug tanang upat (4) ka vice mayoral candidates ang nakatuman na sa pagsumite sa ilang SoCe.
Sa First District, 22 sa 23 ka mga councilor bets ug tanang lima (5) ka kandidato alang sa House of Representatives ang nakasumite na.Sa Second District, tanang tulo (3) ka kandidato sa Kongreso ug 20 sa 25 ka kandidato sa pagka-konsehal ang nakapasa na sa ilahang Soce.
Sa Third District, 20 sa 27 ka mga kandidato pagka-konsehal ug 2 sa 5 ka congressional candidates ang nakatapos sa pagsumite.
Samtang gikanayon ni Atty. Shajani M. Ebrahim, chairperson sa Board of Canvassers ug Election Officer sa Third District nga wala nay extension ang filing, ug gibutyag niini nga ang mga kandidato gihatagan na og 30 ka adlaw aron makasumite.
Gipaklaro usab sa opisyal nga ang kapakyasan sa pagsumite sa Soce usa ka paglapas sa election laws ug maoy hinungdan sa silot nga multa nga mokabt saP30,000 alang sa House of Representatives (1st offense), P20,000 alang sa city mayor ug vice mayor (1st offense)P15,000 alang sa konsehal (1st offense).
Alang sa 2nd offense sa House candidates, ang silot mokabat sa P60,000 ug perpetual disqualification sa pagdagan sa mga posisyon sa gobyerno.
Gipadayag ni Ebrahim nga ilahang isumite sa Comelec Central Office sa Manila ang tanang nahimong Soce submissions.
