Gipasakaan og kasong pagpatay ug pagsulay sa pagpatay ang usa ka 18-anyos nga lalaki human miatake gamit ang espada sa Brinell School sa Fagersta, Sweden, nga miresulta sa pagkamatay sa usa ka estudyante ug pagkaangol usab sa tulo.
Gidakop sa kapulisan ang suspek niadtong Agosto 21 sulod sa maong tulunghaan, diin giingong gipusil kini human misukol atol sa pagdakop. Sumala pa sa mga prosecutors, nagsul-ob og helmet ang lalaki ug nagdala og espada sa dihang gihimo ang maong pag-atake. Giila sa kapulisan ang namatay nga biktima nga usa ka 17-anyos nga babaye, samtang tulo ka lalaki ang nasamdan ug duha kanila ang anaa sa kritikal nga kahimtang.
Gisusi usab sa mga imbestigador ang giingong TikTok account nga nalambigit sa suspek, diin nakita sa wala pa kini matangtang ang mga bidyo bahin sa mga pag-atake sa tulunghaan ug usa ka hulagway sa espada. Dugang pa niini, gipaningkamotan sa mga awtoridad nga matino ang motibo sa pag-atake, samtang nasayran nga aduna nay naunang kaso sa pagpanakit ang suspek.
Sa kasamtangan, nagpabiling sirado ang maong eskwelahan samtang gipadayon sa kapulisan ang lawom nga imbestigasyon. Kapin 80 na ka pakighinabi ang nahimo sa mga awtoridad, samtang giplanong ma-interbyu ang tanang kawani ug estudyante sa tulunghaan nga mokabat sa 450 ka mga tawo.
