Gidala sa Davao Regional Medical Center ang usa ka 18-anyos nga ulitawo nga giilang si alyas Expedie human dunggaba tulo ka higayon gamit ang ice pick sa iyang kalalis nga si alyas Johnly sa Purok Galingan, Barangay Mankilam, Tagum City, Davao del Norte, alas 1:44 sa kaadlawon.
Sumala sa imbestigasyon sa Tagum City Police Station, nagkuyog ang biktima ug iyang amigo aron mamalit sa tindahan bandang alas 1:30 sa kaadlawon apan sa pag-abot nila sa lugar, gisugat sila sa suspek nga miresulta sa mainit nga panaglalis.
Tungod sa kasuko, mikuha og ice pick ang suspek ug gidunggab ang biktima sa wala nga bukton ug wala nga bahin sa lawas, dayon misibat palayo sa crime scene.
Sa pagkakaron, anaa na sa stable nga kondisyon ang biktima samtang padayon ang hot pursuit operation sa kapulisan aron madakpan ang suspek ug mahatagan kini og hustisya sa krimen nga iyang gihimo.
Gipasidaan usab sa mga otoridad ang publiko batok sa paggamit og kusog o armas atol sa panagbangi ug gipahimangnoan nga ang kasuko, kon dili makontrol, mahimong mosangpot sa trahedya.
