Mokabat sa 17 mga magtutungha ang nakabsan sa kinabuhi human nga masunog ang dormitoryo sa usa ka elementary school sa central Kenya.
Nahitabo ang insidente sa Hillside Endarasha Academy sa Kieni, sa Nyeri county.
Sumala sa mga otoridad nga adunay 14 na ka mga tawo ang naangol sa insidente. Tungod sa pagkasunog dili na mailhan ang patay nga lawas sa mga biktima tungod sa hilabihan nga pagkasunog niini. Sa pagkakaron, ginasuta pa sa mga otoridad ang nahimong hinungdan sa nasampit nga sunog. Subay sa pagbana-bana sa education ministry sa Kenya nga adunay 824 ka mga magtutungha ang naka-enroll sa nasampit nga eskwelahan nga gimugna sa 402 ka mga lalaki ug 422 ka mga kababaihan. Gibutyag sab ni Deputy President Rigathi Gachagua nga adunay 70 pa ka mga bata ang wala pa naihap karong panahuna.
