DAVAO CITY – Nakaplagang patay kagahapong buntag, Marso 9, ning tuig ang lawas sa 17-anyos nga si Joshua Nacion nga nalumos niadtong nakalabayng adlaw sa Davao River human kini mitugpa sa Bankerohan Bridge samtang gigukod ang ilahang grupo sa mga kapulisan.
Matud pa ni San Pedro PS Station Commander, PMAJ. Marvin Hugos, nakadawat silag usa ka report nga adunay mga menor de edad sa ubos sa maong tulay diin, dali dayon kini gi-adtoan sa ilahang buhatan aron ma subay.
Dugang pa usab niya, nakigalayon sila ngadto sa Philippine Coast Guard ug 911 rescue team ning dakbayan aron makita ang lawas sa maong lalaki.
Saysay pa usab ni Hugos nga nakarekober ang ilahang grupo og 11 ka mga selopin nga adunay sulod nga rugby, duha ka transparent nga mineral water nga adunay usab rugby ug usa ka botelya nga ilimnon.
Subay usab sa rekord sa San Pedro Police Station, adunay daan kaso sa pagpangawat ang mga suspek.
Sa kasamtangan, anaa na sa kustodiya sa San Pedro Police Station ang tulo ka mga kaubanan niini nga nitugpa usab samtang ang usa usab ka mga kaubanan niini ang nakaikyas sa gipahigayong rescue operation nga sumala pa sa report, puros menor de edad.
