Gikumpirma sa Toril Police Station nga ang unang gikataho nga usa ka 17-anyos nga dalagita nga sumala pa na-missing usa lamang ka tumo-tumo kon walay kamatuoran ang tanan.
Kini ang gipaklaro sa kapulisan human sa ilahang gihimong imbistigasyon gumikan sa maong panghitabo.
Sumala pa ni P/Maj. Sheryl Bautista atol sa gipahigayon nga press conference karong adlawa nga subay sa ilahang gihimong imbistigasyon, ilahang natumbok nga walay kamatuoran ang unang mikatag nga mga istorya nga adunay nahitabo nga kidnapping kang Nhikki.
Nasayran sa ilahang gihimong imbistigasyon nga niadtong panahon nga gitaho ang sa iyahang kabanay ang 17-anyos nga na-missing, anaa lamang diay kini sa panimalay sa iyahang uyab kon karelasyon.
Dugang pa sa mga otoridad nga sa dihang mikatag na sa social media nga gipangita na ang nahisgutan sa iyahang kabanay gilayon sumala pa kini nga gipapauli sa kabanay sa pamilya sa iyahang uyab.
Nasayran usab nga atol sa pagpangita sa ginikanan sa dalagita, nagpadala sumala pa kini og voice message sa messenger nga kuno gidagit kini, ingon man ngadto sa usa ka group chat sa iyahang mga kauban o higala aron makapangayo og tabang.
Tungod niini, laraw karon sa mga otoridad nga pasakahan og kaso ang dalagita tungod sa iyahang gihimo nga nakahatod og kabalaka sa mga katawhan ilabi na ngadto sa mga otoridad ilabi na ang kabahin sa Anti Cybercrime Act.
Kabahin usab niini, nagpahimangno ang kapulisan sa tanang katawhan nga dili maghimo og mga butang nga makamugna og kabalaka sa uban aron dili mag-atubang o kaso.
Kahinumduman nga una na nga nagkatag ang usa ka video nga sumala pa nakit-an ang 17-anyos sa daplin sa karsada sa nakalabay nga gabii nga sumala pa nagluya og wala nay sapot sa ibabaw nga bahin.
