Gikumpirma sa Tagum City Police Station ang usa matud pa ka kalabera nga nakita kagahapong adlawa ngadto sa usa ka boarding house sa Barangay Apokon, Tagum City, Davao del Norte, nga mao kini ang mga bukog sa dugay na nga na missing nga 17-anyos nga babaye, diin gikatahong kaniadto pang 2020 pa kini na wagtang.
Sumala pa ni Lt.Col. Wildemar Tiu, ang labaw sa Tagum Police, nga ilahang gi identipika ang mga bukog nga iya ni Quinnie Grace Arong, 17-anyos, kansang kalit nga nawagtang kaniadto pang Marso 4, 2020.
Lakip sa nakaplagan, mao ang sinina, pantalon, sapatos, relo, medyas lakip sab ang pisi nga maoy gikatahong gigamit sa paggapos sa sako diin gisulod ang biktima.
Dugang pa nga gituohang nagpakaaron-ingun sumala pa ang suspek nga usa ka photographer, aron nga madani niini ang dalagita nga himuon nga model.
Sa karun, natumbok na sumala pa sa mga otoridad ang maong suspek, ug ang kamanduan na lamang sa korte mao ang pagpaguwa og arrest warrant ang ginahulat, aron nga hingpit na kining dakpon sa mga otoridad.
