DAVAO CITY – Gihatagan lamang ug pito ka adlaw sa City Transport and Traffic Management Office (CTTMO) ang mga trisikad ug payong-payong driver nga lokaton ang ilang mga unit sa ilang buhatan aron nga dili kini madala sa ilang impounding area sa Malagos.
Kahinumduman nga nagpahigayon kagahapong adlawa ug clearing operation ang mga sakop sa CTTMO sa Boulevard ning dakbayan diin 16 ka mga trisikad ug 6 ka mga payong-payong gipangkarga ug gidala sa ilang buhatan.
Sumala pa kang Datu Sissay, supervisor sa CTTMO, gipahigayon nila ang nahisgutan nga operasyon human nga nakadawat na sila ug daghanang reklamo gumikan kay nakadugang sumala pa sa paghuot sa dalan ang nahisgutan nga mga trisikad.
Kadaghanan sab sa mga nahisgutan ang wala sumala pay rehistro ug dili luwas nga sakyan sa mga pasahero.
Gipasalig sab sa CTTMO nga magpadayon ang ilang clearing operation batok sa mga nakadisturbo sa mga kadalanan sa siyudad.
