Natala ang kapin 1,500 ka mga biyahe sa mga bus sa Davao City Overland Transport Terminal (DCOTT) atol sa Semana Santa, sumala sa kumpirmasyon ni DCOTT Manager Aisa Usop. Giklaro ni Usop nga kini nga ihap halos kapareho ra sa narekord nga datos sa miaging tuig, nga nagpakita sa padayung gidaghanon sa mga biyahero.
Gawas sa kadaghan sa mga bus trips, misaka sab sa 80,000 ang ihap sa mga pasaherong misulod ug migula sa terminal sulod sa maong semana. Bisan pa sa kalihokan, gipasidungog sa DCOTT ang hapsay nga dagan sa operasyon ug ang kamatuoran nga walay natala nga insidente sa seguridad sulod sa tibuok Semana Santa.
Nagpasalamat si Usop sa tanang pasahero nga matinud-anong misunod sa mga balaod ug giya sa terminal. Giila niya ang disiplina sa katawhan nga dako og tabang aron malikayan ang kalibog ug kagubot sa terminal, ilabi na sa peak season sama sa Semana Santa.
