DAVAO CITY – Mukabat sa kapin 1,500 ka mga sunod-sunod nga linog ang natala sa Philippine Institute of Volcanology and Seismology (PHIVOLCS) nga nasinatian sa probinsya sa Davao De Oro, as of March 13, 2023.
Sumala ni Daniel Jose Buhay, Geologist sa PHIVOLCS-QUICK RESPONSE TEAM , ang mga linog nga nasinatian karong Marso adunay gikusgon gikan sa 1.4 ngadto sa 5.9 magnitude. Sumala ni Buhay, subay sa ilang histogram kaniadtong Marso 7, namatikdan sa ilang buhatan ang pagsaka o spike sa linog nga nakatala og 400 ka mga pagtay-og nga nabatian sulod sa usa ka adlaw.
Samtang gibutyag sab ni Buhay nga hinay-hinay mikunhod ang natala nga mga linog human sa Marso 7. Samtang, gitaho usab sa PHIVOLCS ang nagkalain-laing dapit sa probinsya sa Davao De Oro nga ilang gibisita hain adunay natigayong landslides gumikan sa pagbuak sa yuta nga namugna atol sa magnitude 5.9 ug magnitude 5.6 nga linog.
Ang nahisgutang mga lugar ang gilangkuban sa Brgy. Bukal Nabunturan; Brgy. Palok Katipunan ug Tuburan, Maragusa; Brgy. Andili sa Mawab; Brgy. Camanlangan ug Tandawan, New Bataan Davao De Oro. Samtang nagpadayon usab ang assesment sa buhatan sa epekto sa linog sa Maco Davao De Oro.
Giabisohan usab sa PHIVOLCS ang mga residente nga anaa doul sa nakitang tension cracks o pagliki sa yuta gumikan sa linog nga muhikling dayon ilabi na adunay mipatigbabaw karon nga Low Pressure Area nga possibleng muresulta sa pagdahili sa yuta.
