DAVAO REGION- Nasikop sa mga sakop sa Sulop Municipal Police Station (MPS),ang usa ka amahan human sa pag-atake sa iyang menor de edad nga anak nga babaye pasado alas 11:00 sa udto.
Ang suspek, nga nailhan nga si Jestonie Dela Calzada usa ka 35-anyos nga minyo ug trabahador, gipasanginlan nga giatake ang iyang 14-anyos nga anak nga babaye, “Glyze,” usa ka senior high school student, gamit ang lagaraw atol sa init nga panag-away sa pamilya.
Nahitabo ang insidente sa Purok 7, Barangay Talas, Sulop, Davao del Sur.
Si Glyze nakaangkon og mga samad sa iyang nawong ug mga tudlo ug gidala dayon sa Davao del Sur Provincial Hospital sa Digos City alang sa pagtambal.
Samtang ang suspek ang nasikop ug gipahibalo sa iyang mga katungod nga sa karon anaa na siya sa kustodiya sa Sulop MPS alang sa pagpasaka ug mga kaso.
Samtang sa bahin sa kapulisan, gihatagan niini ug gibug-aton ang pagpanalipod sa mga bata gikan sa tanang matang sa kapintasan.
Gipasalig usab niini nga padayon nga sigurohon sa Sulop MPS nga ang mga nagbuhat og pagpangabuso sa mga menor-de edad nga mapasakaan og kaso ug mahatagan og hustisya.
