Wala nay kinabuhi sa dihang nakaplagan sulod sa iyang kwarto ang usa ka menor de edad sa Block 3, Purok Palmera, Barangay Tiguman, Digos City, atong nakalabayng adlaw.
Giila ang biktima nga si alyas “Lyn” kinse anyos, residente sa nasampit nga lugar. Subay sa report sa mga kapulisan, gabii niadtong Hulyo 9 sa dihang nahibulong ang iyaan sa biktima gumikan sa daghanang messages niini nga wala nareplyan.
Kini maoy rason sa pagbisita sa iyang iyaan ngadto sa panimalay sa biktima, apan dako ang kakurat niini sa dihang nakita nga nagbitay na kini gamit ang nylon nga pisi.
Gisulayan pa og luwas sa iyaan ang biktima pinaagi sa pagputol sa pisi apan wala na kini naluwas pa.
Nasayran nga adunay problemang gidala-dala ang biktima human matud pa ang pagbulag niini sa iyahang uyab.
Gikabutyag usab nga giimbitahan pa sa biktima ang mga amiga niini nga mobisita sa ilahang panimalay gumikan sa nasinatiang problema ayha paman nahitabo ang insidente.
Walay nakitang foul play sa maong panghitabo ug ning kasamtangan, gipahiluna na ang patayng lawas sa biktima.
Nagpaabot usab og pahimangno ang mga otoridad ngadto sa mga ginikanan nga i-monitor ang ilang mga anak, kalakip na usab sa pag awhag sa mga kinsa mang adunay kasintian sa kinabuhi nga dili mahadlok sa pagpangayo og tabang.
