DAVAO DEL SUR- Wala nay kinabuhi sa dihang napalgan ang 15 anyos nga batang babaye kinsa na-missing sa Purok Molave, Barangay Poblacion Uno, Bansalan, Davao del Sur, kagahapon.
Sa inisyal nga imbesigasyon sa mga otoridad, na-missing ang Grade 10 student kaniadtong Hulyo 14 human matud pa nananghid sa bayaw niini giilang si alyas Junjun nga mouna na lamang og uli samtang nag-uban kini sa pagpangita og cooper wire.
Dako matud pa ang kahibulong sa inahan sa biktima sa dihang wala kini nakaabot sa ilang panimalay rason nga gilayon kini nilang gitaho ngadto sa mga kapulisan.
Kagahapon lamang napalgan ang patayng lawas sa bata sulod sa abandonadong balay nga wala nay saput samtang gitabunan og habol.
Sa gihimong lalom nga imbestigasyon sa mga otoridad, nasayran nga ang bayaw mismo niini ang responsable sa krimen human matud pa niya kini gibunalan gumikan sa ilang panaglalis.
Wala usab damha sa nagbangutang pamilya nga nabuhat ni alyas Junjun ang maong krimen sa ilang 15 anyos nga anak hilabi pa nga giila na kini nila isip kabahin sa pamilya.
Gilayong giaresto ang suspek sa kapulisan ug ning kasamtangan, padayon pa ang pagpahigayon og lalom nga imbestigasyon sa maong insidente hilabi pa sa anggulo nga pagpanglugos gumikan wala na kini saput sa dihang nakaplagan.
Gipanghimakak na sa suspek ang maong alegasyon apan ipailom pa kini sa examination aron masayran ang hinungdan sa iyang kamatayon.
Desido sab ang pamilya sa bata nga mopasaka og kaso batok sa ilang umagad.
