Patay ang 14 ka mga tawo ug daghan ang nasamdan sa Nepal kagahapong adlawa, atol sa mga bayolenteng protesta batok sa social media shutdown ug giingong korapsyon, sumala sa report sa state-run television.
Nagpatuman og curfew ang mga awtoridad palibot sa parliament building human misulay ang liboan ka mga nagprotesta nga musulod sa lehislatura pinaagi sa pagbungkag sa police barricade.
Gibabagan sa Nepal ang access sa daghang social media platforms, lakip na ang Facebook, niadtong miaging semana human kini mapakyas sa pagparehistro sa mga awtoridad isip kabahin sa kampanya batok sa abuso sa social media.
Sumala sa gobyerno, gigamit sa mga social media user nga adunay fake ID ang mga plataporma aron magpakaylap og hate speech, peke nga balita, pagpanglimbong, ug uban pang krimen.
