Gitunol na sa International Criminal Court (ICC) prosecution ang kapin 1,300 ka mga ebidensya ngadto sa kampo ni kanhing Pangulong Rodrigo Duterte sulod sa miaging pito ka bulan sa nakalabay nga tuig, lakip na ang mga materyales nga posibleng magpasangil kaniya sa mga pagpatay nga naglambigit sa iyang giyera kontra droga.
Sumala sa usa ka dokumento nga penitsahan niadtong Disyembre 24, 2025 ug gipagawas sa publiko niining semanaha, gipahibalo sa Office of the Prosecutor (OTP) ang Pre-Trial Chamber (PTC) I nga nakahatag na kini og kinatibuk-an nga 1,303 ka mga ebidensya ngadto sa depensa gikan Hulyo 7 hangtod Disyembre 18, 2025.
Sa maong ihap, 906 ang giklasipikar nga “INCRIM” o incriminating; 389 ang gilista isip “Rule 77 evidence,” nga mahimong susihon sa depensa; samtang ang nahibiling walo giklasipikar nga “PEXO,” o posibleng makapahawan sa akusado.
Bisan wala mohatag og ensaktong detalye tungod confidential ang mga dokumento, gikabutyag ang OTP nga ang makapasangil nga ebidensya naglakip sa mga insidente sa pagpatay atol sa barangay clearance operations, lakip na usab ang pagpatay sa mga gitawag og “high-value targets” panahon sa pagkapresidente ni sa kanhing Pangulo.
Nasayran nga ang nasampit nga dokumento gipirmahan sa ICC Deputy Prosecutor Mame Mandiaye Niang.
Apan giila sa prosekusyon nga kining mga ebidensya nga gipadayag human sa Hulyo 1 dili gamiton sa confirmation of charges hearings, nga hangtod karon wala pa usab matakda pag-usab sa korte human gisibog ang orihinal nga iskedyul sa Septyembre.
