Gibuhian na ang nahibiling 130 ka batang estudyante nga gikidnap sa mga armadong lalaki gikan sa usa ka Catholic school sa Nigeria.
Gikumpirma kini ni Presidential spokesman Sunday Dare, kauban ang pagpagawas sa mga litrato sa mga bata isip pamatuod nga sila napagawas na.
Una nang gikidnap ang mga estudyante niadtong miaging bulan human giatake sa mga armadong bandido ang St. Mary’s Private Catholic School. Sa kinatibuk-an, 303 ka bata ang gikidnap, diin ang uban nila 10 anyos pa lang, lakip na usab ang 12 ka magtutudlo.
Nakalingkawas ang mga 50 ka estudyante ug nakabalik sa ilang mga pamilya, samtang 100 ka biktima ang nasagop sa mga security forces sa Nigeria.
Ang maong pagpangidnap niadtong Nobiyembre mao ang pinakabag-ong mga pag-atake sa mga armadong grupo batok sa mga sibilyan, ilabi na sa mga eskuylahan, diin kasagaran ginabuhat ang dagkong pagpangidnap alang sa ransom.
Dili na bag-o ang kaduatan sa Nigeria, nga kanunay marekord sa mga komunidad tungod sa tensiyon tali sa mga lumad sa maong dapit, ingon man ang panagbangi tali sa mga mag-uuma, nga ang hinungdan mao ang limitadong access sa yuta ug mga tinubdan sa tubig.
