Gikumperma sa Inter-Agency Council Against Trafficking (IACAT) ug sa Philippine Embassy sa Cambodia ang desisyon sa korte sa Kandal, Cambodia nga napamatud-ang sad-an ang 13 ka mga Filipina sa pagsupak sa balaod sa Cambodia nga human trafficking ug sexual violations.
Ang mga nahisgutan ang kabahin sa 20 ka mga Filipino nga giaresto gumikan sa ilahang partisipasyon sa surrogacy nga iligal sa Cambodia.
Sa pagtabang sa Philippine embassy sa Cambodia ug sa IACAT, pito sa 20 ka mga Filipinang naaresto nga dili pa buntis, ang na-repatriate pabalik sa Pilipinas kaniadtong Oktobre 2024.
Nagpadayon ang pagpaningkamot sa IACAT nga mutabang ug maprotektahan ang mga biktima sa human trafficking, hinungdan nagpadala sila ug delegasyon niadtong Nobyembre 2024 aron bisitahon ang 13 ka mga filipina ug makighinabi sa mga opisyal sa Cambodia, mahitungod sa kahimtang sa mga nahisgutan.
Nahisubo ang IACAT sa duha katuig nga pagkabilanggo nga gipahamtang sa 13 ka mga filipina apan giila usab nila ang palisiya sa Cambodia batok sa surrogacy ug ang pagpakunhod sa silot, gikan sa 15-20 katuig ug mipadulong na lamang kini sa duha katuig nga pagkabilanggo.
Misaad usab ang IACAT nga magpadayon ang pagtabang sa mga apektadong kababaihan ug magpadayon ang imbestigasyon aron mapasakaan ug kaso, ang mga recuiters nga responsable sa trafficking.
