DAVAO CITY – Nakatala ang Department of Health (DOH)-Davao ug kinatibuk-ang 1,299 measles cases sa Davao Region diin 16 niini ang namatay sukad Enero hangtud na Setyembre 2 ning tuig kasamtangan.
Sumala pa kang DOH-Davao national immunization program manager Dr. Janis Olavides, nga ang measles cases sa Davao Region miubos ug lima ka porsyento.
Gitataw sab ni Olavides nga kinatibuk-ang 1,299 measles cases ang natala sukad Enero 1 hangtud Setyembre 2, 2019.
Ang maong data ang mas ubos sa 1,374 cases nga natala sa susamang panahon sa 2018 kalakip na ang 39 ka mga namatay.
Sa nahisgutan nga ihap, sagad sa mga nataptan ang anaa sa 17 days old ngadto na sa 76 anyos gilangkuban kini sa 638 ka mga babaye (49.1 percent) ug 661 ang lalaki (50.9 percent).
Kinatibuk-ang 1,283 measles victims nga naka-survived ug 16 ang namatay karong tuiga.
Sa Davao City lamang, adunay 536 measles cases ang natala kalakip na ang siyam nga namatay diin sagad sa mga nataptan ang naggikan sa Talomo District ug portion sa Agdao.
Samtang ang Compostela Valley nakatala ug 180 ka kaso diin duruha ang namatay; Davao del Norte adunay 303 ka kaso diin lima ang namatay; Davao del Sur adunay 97 kaso apan walay namatay; Davao Occidental uban ang 23 ka kaso ug zero death; Davao Oriental uban ang 160 ka kaso apan walay natalang namatay.
Samtang nagpadayon sumala pa karon ang kampanya sa ahensiya aron nga batukan ang kaso sa tipdas.
