Apektado karon ang 12 ka mga pamilya sa Alisoso Drive, Udaca Barangay San Miguel,Digos City Davao del Sur human nga gilamoy sa nagdilaab nga kalayo pasado alas 8:00 sa kagabie.
Subay sa report gikan sa usa sa mga biktima nga si Leoniza Compra gituyo sumala pa sa pagsunog ang ilahang balay sa ilahang silingan nga si alyas Pingping, tungod adunay nakakita sa suspetsado nga nagsablig ug gasolina ngadto sa balay ni Leoniza, ug gidagkutan dayon kini nga maoy hinungdan sa pag-ulbo sa kalayo.
Human sa maong panghitabo, gilayon nga nga misibat si Pingping palayo sa maong dapit diin miulbo na ang kalayo sa balay ni Compra, ug mikuyanap kini ngadto sa kasikbit nga mga balay sa iyahang mga igsoon nga giila nga sila si Mae ann Otilla, Rachel Eting, Aldie Villaroza, Manuel Villaroza, Emelo Villoso, Marilyn Compra, Jasmine Salaysay, An An Sabejon, ug giila sa family name nga Villaroza.
Dali usab nga miresponde ang mga personahe sa kabomberohan sa Digos Fire Station apan gumikan kay gama lamang sa light materials kon mga kahoy dali usab nga naugdaw ang maong mga balay.
Sa pagkakaron, ang mga nasunogan andam sumala pa nga mopasaka og kaso nga Arson batok sa suspect nga si Alyas Pingping, samtang ginapangita na karon sa kapulisan aron manubag sa salaod ang suspetsado.
Naayudahan na usab ang mga biktima sa LGU sa Digos samtang temporaryo nagsaka sa ilahang paryente ug ang uban gipahimutang sa temporary shelter.
Padayon pa usab nga ginasuta kung pila ang kantidad sa danyos sa atol sa maong panghitabo.
