DAVAO CITY – Bilangguan ang gipadulngan sa usa ka laborer human niini gipangkawat ang 12 ka mga kahon sa ilimnong makahubog.
Nahitabo ang insidente alas 11 pasado sa gabie niadtong Dominggo diin sumala pa sa tag-iya sa tindahan nga si Solomon Dimea, 56-anyos nga taga Brgy Aquino, Agdao nga nagpatala sa kapulisan human nga natingala kini nga gamay na lamang ang kaha sa beer ang nabilin sa iyahang tindahan.
Hinungdan nga iyahang gi-review ang gimontar niini nga CCTV camera sa iyahang tindahan, ug didto dako kaayo ang iyahang kakurat human nga ang usa niya ka laborer nga si Junjun Campilana Fora Jr ang iyang nakita nga nagkaang-kaang sa paghakot sa mga case sa beer. Wa pa matagbaw, giharbat pa niini ang ang sinsilyo sa hunos.
Human, iyahang gikuha ang usa ka t-shirt aron nga isampong sa CCTV aron nga dili makita, apan pakyas gihapon kini gumikan kay nakuhaan na siya sa maong camera sa pagsulod pa lamang sa maong lugar.
Nagkantidad sumala pa ang nakuha nga beer sa P6,190. Nakatakda sab nga pasakahan ug kasong kawat ang nahisgutang dinakpan.
