Gikumpirma ni Ombudsman Jesus Crispin Remulla nga adunay 12 hangtod 15 ka mga Kongresista nga mag-atubang og kaso sa Sandiganbayan human malambigit sa giingong anomalya sa mga proyekto sa imprastruktura sa gobyerno.
Matod ni Remulla, lakip kini sa 67 ka mga “congtractors” o mga kongresistang nanarbaho usab isip mga kontraktor nga usa ka paglapas sa balaod nga nagdili sa mga opisyal sa gobyerno nga adunay pinansyal nga interes sa mga kontrata sa gobyerno, base sa Republic Act 3019 o Anti-Graft and Corrupt Practices Act.
Gibutyag sa Ombudsman nga kining mga mambabalaod giisip nga mga “low-lying fruits” o mga kasong sayon ra mapamatud-an, ug gilauman nga masang-at ang unang batch sa mga kaso sa Sandiganbayan sa wala pa moabot ang Nobyembre karong tuiga.
Napahibaloan nga nagsugod ang imbestigasyon sa giingong anomalya sa mga flood control projects sa Bulacan human nagsumite og reklamo si Department of Public Works and Highways (DPWH) Secretary Vince Dizon niadtong Setyembre 11, batok sa 20 ka opisyal sa DPWH-Bulacan 1st District Engineering Office ug lima ka pribadong kontraktor.
Lakip usab sa giimbestigahan sa Ombudsman mao ang posibleng kalambigitan ni Commission on Audit (COA) Commissioner Mario Lipana sa giingong budget insertion alang sa mga flood control projects, diin ang iyang asawa gituohang nakakuha og pipila ka kontrata.
Sumala ni Remulla, paspas ang dagan sa imbestigasyon tungod kay adunay mga datos gikan sa COA ug sa Independent Commission for Infrastructure.
Nakatakda usab siyang makigtagbo kang Sandiganbayan Presiding Justice Geraldine Faith Econg aron hisgutan ang paghimo og espesyal nga dibisyon nga motutok sa mga kaso.
