DAVAO CITY – Moabot sa 116 ka mga Locally Stranded Individuals (LSIs) ang nababagan sa Task Force Davao nga buot mosulod sa syudad agi sa mga checkpoints.
Ang nahisgutang mga LSIs mitugpa sa laing airport ug nagbyahe by-land aron makalikay sa Reverse Transcription-Polymerase Chain Reaction (RT-PCR) nga requirement gikan July 20 hangtud July 26, 2020.
Gikanayon ni Task Force Davao Commander, Colonel Consolito Yecla, 16 sa nababagang LSIs ang migamit sa Laguidingan Airport sa Cagayan de Oro City aron makasulod sa syudad, samtang 100 ka lain pa ang mihimo ug land trip.
Sumala pa ni Yecla, taas nga ihap sa mga na-intercep nga LSIs ang miabot taliwala sa mga adlaw nga Biyernes ug Domingo. Dugang pa sa opisyal nga 52 sa LSIs ang mga residente sa syudad sa dabaw samtang ang nahabiling 64 ang igo lamang mo-agi paingon sa laing mga probensiya ug gi-uban sa mga TFD personnel paingon sa exit point aron masiguro nga dili kini maghunong-hunong samtang naa sa ilang byahe.
Gitin-aw ni Yecla nga wala sila gipang-dakop kung dili temporaryo lamang gipugngan aron tabangan nga magbaton ug RT-PCR test ug masiguro nga wala sila nagdala ug virus.
