Nagpadayon ang 10th Infantry Division (Agila) sa ilahang Humanitarian Assistance and Disaster Response (HADR) operations sukad Pebrero 20 hangtod 21, 2026, pinaagi sa pagpahigayon og relief distribution sa tulo ka apektadong lugar nga gilangkuban sa Trento, Agusan del Sur; Bislig City, Surigao del Sur; ug Cateel, Davao Oriental.
Isip kabahin sa nagpadayon nga disaster response operations, ang mga tropa sa 10ID mitabang sa lokal nga mga kagamhanan ug sa hingtungdab nga ahensya aron masiguro ang hapsay ug tukmang paghatod sa ayuda ngadto sa mga pamilyang namakwit ug mga residente nga naapektuhan.
Sa Trento, gipangunahan sa mga sundalo ang pag-apod-apod sa 186 ka relief packs alang sa mga benepisyaryo gikan sa Barangay Manat, Kapatungan, San Isidro, ug San Roque, uban sa koordinasyon sa Municipal Social Welfare and Development Office ug sa Local Government Unit.
Sa Bislig City, mitabang ang mga personnel sa relief distribution sa usa ka evacuation center sa Barangay Tabon, aron suportahan ang mga pamilyang temporaryong nibakwit tungod sa bag-ohay lamang nga dili maayong kahimtang sa panahon.
Samtang sa Cateel sa Davao Oriental , mitabang ang mga tropa sa 10ID sa Municipal Social Welfare and Development Office ug sa Municipal Disaster Risk Reduction and Management Office sa paghatod og humanitarian assistance ngadto sa mga evacuees gikan sa mga barangay nga naapektuhan sa shearline.
Sumala ni Alvin Luzon, Commander sa 10th Infantry (Agila) Division, nagpadayon ang Dibisyon sa bug-os nga komitment sa pagpalig-on sa HADR operations sulod sa ilang area of responsibility.
“Magpadayon ang among mga tropa sa pag-suporta sa lokal nga mga kagamhanan ug partner agencies aron masiguro nga ang ayuda mahatod sa epektibo nga paagi ug maabot ang mga labing nanginahanglan. Andam kami motubag bisan asa gikinahanglan ang among presensya,” matud pa niya.
Gipamatud-an pag-usab sa 10th Infantry (Agila) Division ang ilahang komitment sa hisgutanang pagrespondi, koordinasyon, ug mission-oriented nga operasyon aron suportahan ang mga komunidad nga naapektuhan, subay sa ilahang mandato nga mag-alagad sa katawhan ug panalipdan ang nasud.
