Nakab-ot sa 10th Infantry (Agila) Division, Philippine Army (10ID), ang dakong dungog human makadaog og daghang awards atol sa ika-129 nga Founding Anniversary sa Philippine Army nga gipahigayon sa Fort Andres Bonifacio sa Taguig City niadtong Marso 19, 2026.
Mitambong sa maong kalihukan si Pangulong Ferdinand R. Marcos Jr., uban si Secretary of National Defense Gilberto Teodoro Jr., AFP Chief of Staff General Romeo Brawner Jr., ug si Lieutenant General Antonio Nafarrete, Commanding General sa Philippine Army.
Ang tema sa selebrasyon karong tuiga mao ang “Ang Inyong Matatag na Hukbong Katihan,” nga nagpasabot sa importante nga papel sa Army sa pagpanalipod sa nasudnong seguridad, pagpalambo sa nation-building, ug pagpalig-on sa disaster response capabilities.
Isip pag-ila sa ilahang talagsaong performance sa leadership, administrasyon, training, ug operational readiness, gihatagan ang 10ID sa Commanding General, Philippine Army (CGPA) Streamer for Overall Unit Excellence o “KAHUSAYAN”nga usa sa labing taas nga unit awards sa Philippine Army nga ginahatag sa infantry division nga adunay labing maayong performance sa tibuok Army.
Ang maong award gidawat ni Major General Alvin Luzon, PA, Division Commander, nga nagpasabot sa padayon nga kalig-on sa operasyon ug kahusayan sa organisasyon sa dibisyon.
Samtang, nakuha usab sa 10th Station Hospital (10SH) ang CGPA Streamer for Innovation (LIKHA) tungod sa outstanding initiative sa pagpalambo sa military healthcare services. Ang maong award gidawat ni Colonel May Maaño, PA, Commanding Officer sa 10th Station Hospital.
