DAVAO CITY – Gibutyag sa 1003RD Infantry brigade nga nakarekober sila ug 67 ka mga armas gikan sa nagkadaiyang operasyon ilalom sa ilang area of jurisdiction sukad Enero ning tuig kasamtangan.
Pinakabag-o niini ang 22 ka mga high-powered firearms nag narekober sa utlanan sa Paquibato ug Calinan district.
Sumala pa kang Col. Nolasco Mempin, brigade commander, nga nagkahinay na matud pa karon ang mga rebeldeng kalihokan.
Gani sa kasamtangan, nagkahiusa na matud pa ang Pulang Bagani Command 1, 2, ug 3 ug gitawag nila ang ilang grupo nga Pulang Bagani Battalion sa pagpanguna sa usa ka alyas Botchok. Ang nahisgutan sumala pa nga batalyon adunay 58 fighters uban ang 56 ka mga armas.
Gikanayong hinay-hinay na matud pa nga nawagtang ang rebeldeng kalihokan human nga ubay-ubay na nga mga armas ang narekober sa militar gikan sa mga rebelde.
Nagmalampuson sab sumala pa ang ilang mga operasyon sa tabang sa komunidad ingon man sa mga kanhi rebelde nga mibalik sa sabakan sa kagamhanan.
