DAVAO CITY – Gibutyag ni Department of Health XI focal person on Covid-19 Dr. Ashley Lopez nga anaa sa 100 ka mga nurses ang ipapadala sa National Government aron mutabang sa sitwasyon sa Covid-19 sa dakbayan sa dabaw.
Gitino sa opisyal nga ang mga nasampit nga nurses kini i-deploy sa Southern Philippines Medical Center ingon man sa mga private hospital sa syudad.
Gawas niini, muhatag sumala pa ang Department of Health og mga ventilators ug mga Personal Protective Equipment (PPEs) isip dungag nga pag protekta batok Covid-19.
Nagpabilin matud pa nga suliran sa SPMC ang kakulangon sa pasilidad gumikan nga mao lang kini ang nagadawat og 90-95 percent sa mga Covid-19 patients ingon man sa mga moderate, severe ug critical nga pasyente diin anaa lamang matud pa sa 10 percent ang ginadawat sa mga pribadong hospital sa syudad.
Hinuon, gitataw sa opsiyal nga taas ang recovery rate sa pasyente sa nasampit nga sakit hinungdan anaa sa 51 percent ang bakanteng Covid-19 beds sa balay tambalanan.
Samtang, kapin 2,000 na ang Isolation ug Quarantine beds sa dakbayan alang sa pasyente sa Covid-19.
