DAVAO CITY – Naglusad na karon ug hot pursuit operation ang kasundalohan ingon man kapulisan sa Matanao Davao del Sur aron nga gukdon ang gikanayong mga sakop sa mga rebeldeng New People’s Army (NPA) nga midabdab sa 10 wheeler truck nga adunay kargang mga sinako nga bugas.
Matud pa kang Chief Inspector Yancee Butch Golocan, hepe sa Matanao Municipal Police Station, unom ka mga lalaki nga sakay sa motorsiklo ang misunog sa maong truck nga gipanag-iyahan ni Henry Sorongon diin gipangti-onan ug armas ang driver ingon man pahinante sa truck ug gipanaug ang mga nahisgutan ayha gihimo ang pagpangsunog. Human ang insidente, paspas nga misibat palayo sa lugar ang mga suspek.
Nagpadayon ang gilusad nga imbestigasyon sa kapulisan apan subay sa ilang inisyal nga imbestigasyon, pagpangilkil ang nag-unang motibo sa krimen.
