DAVAO CITY – Gisugdan na sa lokal nga kagamhanan sa dakbayan sa Davao sa pag-implementar sa 10-percent increase sa business tax rate base na usab sa bag-ong local revenue code nga gi-aprubahan sa Sangguniang Panlungsod sa milabay nga tuig.
Sumala pa ni Erwin Alparaque, ang head sa Tax Research and Action Team (TRACT) nga ang pag-increase sakto lamang sa panahon ug gikinahanglan usab kini.
Sulod sa 12 ka tuig ang mga negosyo sama sa restaurants, cafes, carenderias ug eateries ang mibayad lamang ug P1,261.25 base sa provision sa less than P50,000 sa annual gross income.
Ilalom sa bag-ong tax code, ga-kolekta na ang kagamhanan ug P1,497.38 gikan sa mga nahisgutan.
Kadtong dunay annual gross income nga P200,000 ngadto P250,000, mangolekta na sa karon ug P3,226.47, ug alang adtong dunay annual gross income nag P1 million ngadto na sa P2 million, anaa sa P9,160.31 ang kolektahon isip business tax.
Matud pa ni Alparaque nga ang pag-usbaw nagbase sa Local of Government Code of 1991 nga nagkanayon nga ang Local Government Units (LGUs) mubag-o ang tax code usa matag lima ka tuig, gamay ra itandi sa ubang highly-urbanized cities.
Gilauman nga ang pag-increase sa tax code mapalambo pa ang tax collection, ingon man makatabang ug mapatas-an ang tinuig nga budget sa kagamhanan sa tuig 2019.
