Nakabsan sa kinabuhi ang napulo ka mga tawo atol sa nahitabong mass shooting sa usa ka eskwelahan sa British Columbia sa Canada samtang 25 ang naangol.
Gibutyag sa Royal Canadian Mounted Police nga siyam ang mga biktima sa pagpamusil samtang ang suspek nga gunman nakit-an usab nga patay na ug gituohang “self-inflicted” ang iyang naangkon nga samad.
Base sa report, gihulagway sa gipagawas nga alerto nga ang suspek usa ka babaye nga nagsul-ob og bestida ug kolor brown ang buhok.
Unom ka patay nga lawas sa mga biktima ang nakit-an sulod sa Tumbler Ridge Secondary School, samtang duha pa ang narekober duol sa usa ka residential property ug usa ang namatay samtang gidala sa ospital. Human sa krimen, gisirado ang Tumbler Ridge Secondary School ug Tumbler Ridge Elementary School alang sa tibuok semana.
Sa pagkakaron nagpadangat og pahasubo si British Columbia Premier David Eby sa mga pamilyang nabilin sa mga biktima sa makalilisang nga trahedya ug nagsiguro sa suporta alang sa mga apektadong komunidad.
