DAVAO CITY – Dul-ang dili muubos sa napulo ka mga panimalay ang naguba human miigo ang usa ka buhawi sa Isla Verde Barangay 23- Mini Forest Boulevard, Davao city.
Saysay pa sa mga residente nga pasado ala una kagainang kadlawon , nabatian nila ang pag-agi sa buhawi sa ilang panimalay nga dunay dala nga kusog nga hangin ug kusog nga pagbunok sab sa ulan.
Sumala usab sa usa ka apektadong residente, nga gumikan sa kakusog sa hangin, nadala apil ang atop sa ilang panimalay ingon man ang ilang mga kabtangan ug natumba sab ang mga punoan.
Daw gituohan sa mga residente nga katapusan na sa ilang kinabuhi, tungod mismo sila, hapit madala gumikan sa kakusog sa hangin.
Dako usab ang ilang pasalamat, gumikan walay natalang casualities ug luwas ug anaa sa mayung kahimtang ang tanang mga apektadong residente.
Nanawagan usab kini og tabang gikan sa lokal nga panggamhanan gumikan sa halapad nga damyos nga ilang naangkon gumikan sa maong buhawi.
