Gideklara sa PDEA Regional Office XI nga mokabat sa 10 ka mga barangay sa Davao Region ang wala nay presensya sa illegal nga droga human kining gikumpirmang drug-cleared.
Ang mga gipang-ila drug-cleared barangays mao ang Astorga, Inawayan ug Zone III sa Sta. Cruz, Davao del Sur, Magatos ug San Vicente sa Asuncion, Canocotan sa Tagum City, Lunga-og sa Sto. Tomas, Davao del Norte, Andap sa New Bataan, Pangotusan sa Nabunturan, Davao de Oro ug Batiano sa Baganga, Davao Oriental.
Gipangunahan ang deklarasyon sa PDEA Regional Office XI kauban ang mga miyembro sa DILG, DOH, PRO XI ug mga representante sa mga nagkadaiyang local government units sa rehiyon.
Nakab-ot sa mga barangay ang drug-cleared status human malampusong nakasubmitar og gikinahanglang mga dokumento nga gitakda sa Dangerous Drugs Board, pinasubay sa Regulation Number 4, Series of 2021.
Ning kasamtangan, mokabat sa 29 ka barangay sa rehiyon ang gideklarar sa komite pinaagi sa mga resolusyon nga “No Presence of Drug personalities” samtang 180 ka barangay sa rehiyon ang nagpabilin sa ilang Drug-Cleared Status.
Samtang, subli usab nga nagpahinumdom ang maong buhatan ngadto sa publiko nga dili mahadlok nga musumbong kung ugaling adunay nahibaw-an kalabutan sa pakigbatok sa iligal nga droga.
Pagpasabot pa niini, nga ang pagpakgang sa maong problema mamahimo lamang nga malampuson kung ang tanang mga kapulisan lakip na usab ang publiko ang magtinabangay niini.
