DAVAO CITY – Usa ka bangga tali sa pangpasaherong van ug motorsiklo ang nahitabo alas 6:52 kagabii duol sa Lasang Bridge, Licanan, ning Dakbayan sa Davao.
Sumala sa mga nakakita, ang nasangpit nga van nga adunay biyahe nga Davao-Baganga ang kalit na lang nga nidaro sa usa ka motorsiklo nga patabok unta sa pikas nga linya sa kalsada.
Miresulta kini sa pagkaangol sa driver sa motorsiklo nga si Louie Mar Villanueva, 35 anyos, lumulupyo sa Bunawan ning Dakbayan.
Gumikan sa kakusog sa impact, nawad-an og panimuot ang biktima.
Daling miresponde ang Central 911 sa gipanghitabuan sa insidente, ug gilayong gidala sa balay-tambalanan ang biktima aron maatiman kini.
Sumala sa asawa sa biktima nga si Apple Villanueva, musundo unta kaniya ang iyang bana gikan sa Bunawan, apan wala kini nagdahum sa gidangatan niini.
Padayon ang imbestigasyon sa maong insidente, ug ginapanubayan gihapon ang kahimtang sa biktima, nga anaa sa kritikal nga kondisyon.
Nagpahimangno sab karon ang otoridad ngadto sa mga motorista nga kanunay mag-igmat sa pagmaneho ilabi na panahon sa kagabhi-on o mga lugar nga ngit-ngit aron nga malikayan ang disgrasya.
