Nakabsan sa kinabuhi ang usa ka lalaki human nga kini ang gipusil kagahapon sa hapon. Samtang samdan usab ang duha ka mga indibidwal atol sa maong pagpamusil nga kini nahitabo sa Barangay Kingking, Pantukan, Davao de Oro.
Subay sa report sa mga otoridad, giila ang biktima nga si Cyle Bryan Ginoo, residente sa Purok Mahigalaon, Barangay Kingking.
Samtang ang mga naangol mao sila si Jayvane Jañola Nepangue, 22-anyos, usa ka lalaki, ug si Ferlyn Toñares Badliz, 22-anyos nga babaye, nga susamang residente sa nasampit nga lugar.
Subay sa inisyal nga imbestigasyon sa Pantukan Municipal Police Station, nahitabo ang pagpamusil pasado alas Singko sa hapon sa sulod sa tindahan sa Nicole Motor Parts sa Sitio Towsnite, Barangay Kingking, Pantukan.
Sumala pa sa mga nakakita, kalit nga miabot ang wala mailhi nga suspetsado ug gilayon kining namusil ngadto sa biktima sa makadaghang higayon gamit ang armas nga.45 nga pistola.
Gisulayan pa og dala sa ospital ang biktima apan gideklara kini nga Dead on Arrival sa mga doktor.
Atol sa maong pagpamusil napagan ang duha ka mga biktima nga nakaangkon ug samad pinusilan sa nagkadaiyang bahin sa ilahang kalawasan nga dali usab nga gitambalan.
Narekober sa crime scene ang duha ka empty shells ug usa ka live ammunition nga gituohang gikan sa .45 caliber nga pistola.
Sa pagkakaron, padayon pa ang gihimong imbestigasyon sa mga otoridad aron masuta ang motibo sa maong panghitabo.
