BANSALAN, DAVAO DEL SUR – Patay ang usa ka pasaherong sekyu sa usa ka bus human nga gipusil sa usa ka pulis.
Nakahiagom og dakong samad pinusilan sa ulo ang giilang biktima nga si Reynaldo Bigno Jr. ganinang kadlawon, pasado alas dos, karong adlawa sa Sabado, Disyembre 28 ning tuiga sa Kinuskusan, Bansalan, Davao Del Sur.
Nasayrang lumulupyo ang biktima sa Sitio Flortam, Batasan, Makilala.
Subay sa imbestigasyon, giila ang suspek nga si PCpl. Alfred Dawatan Sabas, aktibong police sa Police Sation 7 sa General Santos City.
Nunot sa panghitabo, ang pulis pa mismo matud pa ang miingon sa drayber sa bus nga mangayo og tabang sa checkpoint pag-abot sa 1104th RMFB 11 border control point sa New Opon, Magsaysay, Davao del Sur.
Apan, inay nga musurender, gipamusil sa suspek ang duruha pa ka mga pulis nga anaa sa checkpoint.
Hinoon, gilayong nadala sa balay tambalan ang 2 ka mga naangol.
Nasayrang kauban sa suspetsado ang asawa niini diin matud pa nagkalalis ang duha ug lango sab matud pa sa makahubog nga ilimnon ang suspetsado.
Human sa panghitabo, gilayong miikyas ang suspetsado apan nadakpan gihapon kini gumikan gilayong nagpahigayon og hot pursuit operation ang kapulisan.
