Patay ang usa ka minero samtang nasamdan ang iyang kauban human sila gi-ambush sa wala mailhing mga suspek sa Sitio Bongco, Barangay Calapagan, Lupon, Davao Oriental niadtong Marso 11, 2026, pasado alas 2:00 sa hapon.
Giila ang nakbsan sa kinabuhi nga si Perlito Flores,60 anyos, minero ug residente sa Lanao del Norte, samtang ang samdan mao si Jumie Masunag, 32 anyos, minero ug residente sa Panlaysan, Sangab Caraga, Davao Oriental nga karon nagpaayo pa sa ospital sa Davao Oriental Provincial Medical Center.
Sumala sa taho sa Lupon Municipal Police Station, sakay sa motorsiklo ang duha gikan sa tunnel site, Sitio Bangol, Barangay Tubaon paingon sa Barangay Calapagan sa dihang kalit sumala pa silang gipaarakan sa mga suspek nga armado og kalibre .45 nga pistola.
Dugang pa sa report nga gikuha sumala pa sa mga suspek ang 6.5 ka kilo nga hilaw nga bulawang abo, 40 ka gramo nga refined gold, ug kapin sa ₱10,000 nga kwarta gikan sa mga biktima.
Ang kapulisan nagtuo nga posibleng tulis o personal grudge ang motibo sa krimen samtang padayon karon ang manhunt operation ug imbestigasyon aron mailhan ug madakpan ang mga suspek.
Gumikan sa maong panghitabo, nagpahimangno usab ang mga opisyal sa Barangay Calapagan sa komunidad nga magpabiling alerto ug maghatag gilayon og impormasyon kung adunay nahibal-an sa maong panghitabo aron masulbad gilayon ang kaso ug mahatagan og hustisya ang gidangatan sa biktima.
