DAVAO CITY – Gikasubo pag-ayo sa ginikanan ang gidangatan sa 9 anyos nga batang babaye human nga nakaplagan na ang patay’ng lawas niini human nga naanod sa sapa sa Dipag 2, Manuel Guianga, ning dakbayan sa dabaw.
Subay sa impormasyon ang biktima giila nga si Ashley Dela Cruz, diin nadakin-as matud pa ang biktima samtang nagdula kini daplin sa sapa hinungdan nga naapil kini og kaanod atol sab sa nagahaguros sa tubig kagahapong adlawa dala sa kusog nga ulan nga nasinatian sa dakbayan sa dabaw.
Una ng gikatahong missing ang bata sa Purok 7 Sitio Dipag 2, Brgy. Manuel Guianga, Tugbok District, ning syudad hinungdan nga gipangita gilayon kini sa ginikanan ingon man sa otoridad.
Gikaingon nga atol sa maong panghitbao, wala matud pa ang ginikanan sa biktima sanglit miduaw kini sa iyang apohan.
Nagpahimangno karon ang otoridad sa mga ginikanan nga bantayan pag-ayo ang ilang mga anak gumikan nga padayon nakasinati og maot nga panahon ang syudad.
Samtang nagpabilin sab nga missing karong panahona ang usa ka 4 anyos nga bata human kini naanud sa samtang anaa sa creek sa Pabahay, Papag, Brgy. Poblacion, Caraga, Davao Oriental.
