Gipasalig sa Bureau of Fisheries and Aquatic Resources (BFAR) nga walay maapektuhan sa pag-apud-apud sa ₱3,000 nga fuel subsidy alang sa mga mananagat sa tibuok nasud, aron maprotektahan ang ilahang panginabuhi-an gikan sa epekto sa tensyon sa Middle East.
Sumala sa ahensya, bisan sa wala pa mahitabo ang kagubot sa rehiyon nga hinungdan sa pagsaka sa presyo sa petrolyo, nakalatid na sumala pa ang ilahang fuel subsidy program.
Sa kasamtangan, kapin sa 10,000 ka mga mananagat nga gikan sa lain-laing rehiyon ang nakabenepisyo sa maong ayuda.
Aron mapadali ang paghatag sa ayuda, nakig-koordinar na ang BFAR sa Development Bank of the Philippines (DBP) alang sa dali nga pagpagawas sa dugang pondo.
Ilawom sa Fuel Assistance Program, matag kwalipikadong mananagat makadawat og one-time nga ayuda pinaagi sa cash card o voucher, nga gimugna aron mas sayon ang pagkuha sa tabang, ilabi na sa mga benepisyaryong nagpuyo sa lugar nga layo sa mga gasolinahan.
Gikanayon sa Department of Agriculture (DA) nga human sa sektor sa pagpangisda, susihon na usab sa gobyerno ang paghatag og fuel assistance sa mga mag-uuma nga nagsalig sa makinarya sa ilahang mga abot sa pagpanguma.
