Gipanghatag na sa Department of Social Welfare and Development (DSWD) Region XI ang P27.3 milyon nga ayuda alang sa mga pamilya nga grabeng naapektuhan sa magnitude 7.6 ug 6.8 nga linog nga miigo sa Davao Region niadtong Oktubre 10, 2025.
Base sa gisaysay sa Disaster Response Management Division (DRMD) sa DSWD, Davao Oriental ang pinakadakong naapektuhan diin 66,657 ka pamilya o 282,323 ka indibidwal ang nalambigit sa kalamidad.
Sa pagkakaron, 1,345 ka pamilya ang temporaryong nagpuyo sa mga evacuation centers, samtang 278 ka balay ang natibag ug 912 pa ang napartihan. Sa Davao del Norte, 238 ka pamilya o 1,056 ka indibidwal ang naapektuhan sa upat ka munisipalidad ug 26 ka barangay.
Anaa sa 60 ka pamilya ang nagpabilin sa mga evacuation centers, ug natala ang 6 ka balay nga totally damaged samtang 69 ang partially damaged.
Samtang sa Davao de Oro, 699 ka pamilya o 3,070 ka indibidwal ang naapektuhan, diin 224 ka pamilya ang kasamtangang naglungtad sa evacuation centers.
Natala usab ang 9 ka balay nga totally damaged ug 352 nga partially damaged. Gipang-apod-apod usab sa DSWD ang 2,000 ka family food packs nga nagkantidad og P1.17 milyon, lakip na ang ubang relief items alang sa mga biktima.
Sa kasamtangan, nagpabilin nga andam ipanghatag sa rehiyon ang P2.1 milyon nga standby funds ug 100,049 ka family food packs nga nagkantidad og P58.9 milyon, aron matabangan dayon ang mga pamilya nga padayon nga nag-antos sa epekto sa linog.
