Nanawagan si Senador Francis Pangilinan sa Department of Agriculture (DA) nga dayon gamiton ang gibanabanaan nga ₱18 bilyon nga wala magamit nga pondo gikan sa 2025 budget aron pondohan ang fuel ug fertilizer subsidies alang sa mga mag-uuma ug mananagat.
Matod niya, dili na angay malangan ang pagpagawas sa pondo ilabi na kay padayon nga naapektuhan ang sektor sa agrikultura ug pangisda tungod sa pagsaka sa gasto nga resulta sa tensyon sa Middle East.
Gibutyag sa senador nga importante gamiton kini nga pondo aron mapagaan ang kabug-aton sa lokal nga mga prodyuser ug malikayan ang pagsaka sa presyo sa pagkaon sa merkado.
Nasayran nga nakapagawas na ang gobyerno og ₱10 bilyon nga ayudang pinansyal alang sa kapin 4.1 milyones ka mag-uuma ug mananagat, nga tugbang kini sa ₱2,325 matag benepisyaryo.
Apan gibutyag ni Pangilinan nga lahi pa ang ₱18 bilyon nga mahimong i-realign gikan sa wala magamit nga pondo, lakip ang alang sa farm-to-market roads ug ubang programa.
Nagpasidaan siya nga kung dili dayon molihok ang gobyerno, posibleng mosamot ang krisis sa suplay sa pagkaon tungod sa pagsaka sa presyo sa lana ug abono sa global nga merkado.
Gidugang pa niya nga ang paspas nga paggamit sa pondo makatabang dili lamang sa mga mag-uuma ug mananagat kondili usab sa mga konsumante nga direktang naapektuhan sa pagsaka sa presyo sa mga palaliton.
Kabahin niini, gihagit niya ang DA nga paspasan ang proseso sa realignment sa pondo subay sa balaod aron masiguro ang dayon nga tabang sa sektor.
